மும்பை: பிரபல பாலிவுட் நடிகை ஷில்பா ஷெட்டியின் கணவரும் பிரிட்டன் தொழிலதிபருமான ராஜ் குந்த்ரா ஆபாச படங்களை தயாரித்து வெளியிட்டதாக நேற்று நள்ளிரவில் அதிரடியாக கைது செய்யப்பட்டார்.
இந்திய பிரிட்டன் தொழிலதிபர் ராஜ் குந்த்ரா. இவர் கடந்த 2004 ஆம் ஆண்டு பிரிட்டன் நாட்டில் 198 ஆவது பணக்கார நபராக ஒரு புத்தகத்தில் தெரிவிக்கப்பட்டது. இவர் முதல் மனைவியை விவாகரத்து செய்துவிட்டு கடந்த 2009 ஆம் ஆண்டு பாலிவுட் நடிகை ஷில்பா ஷெட்டியை திருமணம் செய்து கொண்டார்.
ஜே எல் மீடியா என்ற பெயரில் மொபைல் செயலியை நிறுவி அதில் வெப் சீரிஸ்களை தயாரித்து வருகிறார் ராஜ். இவர் மும்பையில் கட்டுமான நிறுவனத்தையும் நடத்தி வருகிறார்.
கிரிக்கெட் லீக்
இந்திய கிரிக்கெட் லீக் போட்டியில் ராஜஸ்தான் ராயல்ஸ் அணியின் ஒரு பங்குதாரராகவும் இருக்கிறார். இவர் ஆபாச படங்களை தயாரித்து வெளியிட்டதாக மும்பை போலீஸாரால் நள்ளிரவில் கைது செய்யப்பட்டார். இந்த வழக்கில் முக்கிய குற்றவாளியாக கருதப்படுகிறார்.
மும்பை குற்றப்பிரிவு
இவர் மீது ஆபாச படங்களை தயாரித்து செயலிகளில் வெளியிடுவதாக கடந்த பிப்ரவரி மாதமே மும்பை குற்றப்பிரிவு போலீஸார் வழக்கு பதிவு செய்திருந்தனர். இந்த வழக்கை விசாரித்து வந்ததில் ராஜ் குந்த்ரா முக்கிய குற்றவாளி என தெரியவந்ததை அடுத்து அவர் கைது செய்யப்பட்டுள்ளதாக மும்பை போலீஸ் கூறுகிறது.
ராஜ் குந்த்ரா முக்கிய குற்றவாளி
இவருடன் சேர்த்து மாடலும் நடிகருமான கெஹானா வஷிஸ்த் உள்பட 9 பேர் கைது செய்யப்பட்டனர். ஆபாச படம் தயாரிப்பதில் பிரிட்டன் நிறுவனத்தின் பங்கு இருப்பதாக தெரியவந்ததை அடுத்து விசாரணையில் அது ராஜ் குந்த்ராவின் நிறுவனம் என தெரியவந்தது.
8 ஆபாச வீடியோக்கள்
அந்த பிரிட்டன் நிறுவனத்தின் இயக்குநர் உமேஷ் காமத் தினந்தோறும் செயலிகள் மூலம் குறைந்தபட்சம் 8 ஆபாச வீடியோக்களையாவது பதிவேற்றம் செய்துவிடுவாராம். இவர் பதிவேற்றம் செய்யும் ஆபாச வீடியோக்களை மொபைல் போனில் பணம் கட்டி பார்க்கக் கூடிய செயலிகளில் மட்டுமே பார்க்க முடியுமாம்.
