கனமழை எச்சரிக்கை விடுக்கப்பட்டுள்ளதை தொடர்ந்து முதலமைச்சர் தலைமையில் ஆலோசனை நடைபெற்றது.
சென்னையில் இன்று முதல் அடுத்த 3 நாட்களுக்கு கனமழை பெய்யும் என வானிலை ஆய்வு மையத்தின் சார்பில் எச்சரிக்கை கொடுக்கப்பட்டுள்ளது. சென்னை மாநகராட்சி சார்பில் அனைத்து முன்னெச்சரிக்கை நடவடிக்கைகளும் தொடர்ந்து எடுக்கப்பட்டு வருகிறது. இதுமட்டுமல்லாமல் தேசிய பேரிடர் மீட்பு படையும் தயார் நிலையில் இருந்து வருகிறது.
பணிகளை ஒருங்கிணைக்க ஐஏஎஸ் அதிகாரிகள் நியமணம்
பருவமழை எதிர்கொள்ள சென்னை மாநகராட்சியில் பணிகளை ஒருங்கிணைக்க ஐஏஎஸ் அதிகாரிகள் நியமணம் செய்யப்பட்டுள்ளனர். 5 மண்டலங்களுக்கு தலா ஒரு ஐஏஎஸ் அதிகாரி தலைமையில் 3 குழுக்களை அமைத்து தமிழக அரசு உத்தரவிட்டுள்ளது. பணிகளை ஒருங்கிணைக்க கட்டா ரவிதேஜா, கே ஜே பிரவீன், அமித் ஆகியோர் தலைமையில் குழு அமைக்கப்பட்டுள்ளது.
180 வெள்ள அபாய பகுதிகள்
சென்னை மாநகராட்சியில் 180 வெள்ள அபாய பகுதிகளில் கூடுதல் கவனம் செலுத்த உத்தரவிடப்பட்டுள்ளது. மழைநீர் வடிகாலில் 43 இடங்களில் இணைப்பு பணிகளை விரைந்து முடிக்க மாநகராட்சி சார்பில் அறிவுறுத்தப்பட்டுள்ளது. கடந்த ஆண்டு வெள்ளத்தில் பாதிக்கப்பட்ட 180 இடங்களில் முன்னெச்சரிக்கை பணிகளை மேற்கொள்ள அறிவுறுத்தப்பட்டுள்ளது. மேலும் மெட்ரோ ரயில் பணி நடக்கும் பகுதிகளில் மழைநீர் தேங்கக்கூடிய 25 இடங்களில் கூடுதல் கவனம் செலுத்தவும் உத்தரவிடப்பட்டுள்ளது. 213 மின்சார மோட்டார்கள், 50 நீர் இறைக்கும் மோட்டார்கள் என 913 மோட்டார்கள் தயார் நிலையில் உள்ளன.
பருவமழை முன்னெச்சரிக்கை நடவடிக்கை தொடர்பான பணிகள் ஆய்வு
நாளை மறுநாள் ரெட் அலர்ட் கொடுத்திருக்கும் நிலையில் முதலமைச்சர் மு க ஸ்டாலின் பருவமழை முன்னெச்சரிக்கை நடவடிக்கைகள் தொடர்பான பணிகளை ஆய்வு மேற்கொண்டார். மேலும் மழை தொடர்பாக மக்களுக்கு பாதிப்பு ஏற்படாத வகையில் பணிகளை மேற்கொள்ள உத்தரவிட்டதாகவும் கூறப்படுகிறது.
சென்னை தலைமை செயலகத்தில் ஆய்வுக்கூட்டம்
இந்நிலையில் பருவமழை முன்னெச்சரிக்கை நடவடிக்கை பணிகள் தொடர்பாக முதலமைச்சர் தலைமையில் சென்னை தலைமை செயலகத்தில் ஆய்வுக்கூட்டம் இன்று நடைபெற்றது. இதில் துணை முதலமைச்சர் உதயநிதி ஸ்டாலின், தலைமைச் செயலாளர், அரசு உயர் அதிகாரிகள் உள்ளிட்ட பலரும் கலந்து கொண்டனர்.
